Këto dy ngjarje do të krijojnë një realitet të ri botëror, në të cilin do të na duhet të mësojmë të lundrojmë. Shpallja publike e Kontaktit me jetën e huaj dhe shkatërrimi i mjedisit të botës sonë mund të çojnë në konflikt në rritje dhe gjithashtu në një trazim të thellë të “mjedisit tonë mendor” njerëzor, i cili do të ketë një kosto gjithnjë e më të madhe mbi shëndetin e mirëqenien e individëve dhe të shoqërisë në tërësi.

Në këtë realitet të ri, qasjet tona tradicionale për zgjidhjen e problemeve — përfshirë risinë teknologjike dhe rritjen ekonomike — nuk do të mjaftojnë për të përballuar shkallën dhe ndërlikueshmërinë e sfidave që do të hasim. Megjithatë, ne kemi mundësinë të shkojmë përtej konflikteve tona të hershme politike, kulturore e fetare, për të vendosur një jetë të qëndrueshme e të përballueshme në botë dhe një pjesëmarrje më të madhe me universin përreth nesh. Në fakt, ky është premtimi i racës njerëzore: të dalë nga izolimi, t’i zgjidhë dallimet tona të vogla dhe të hyjë në univers si një familje e vetme njerëzore e bashkuar.

Për ta bërë këtë, ne duhet ta kultivojmë inteligjencën tonë më të madhe njerëzore. Kjo inteligjencë më e madhe — atë që Mesazhi i Ri e quan “Dija” — mund t’u sjellë qëndrueshmëri mjediseve tona mendore vetjake e kolektive dhe mund të mbështetë shëndetin e marrëdhëniet tona ndërsa kalojmë nëpër ngjarje të vështira. Me akses në këtë inteligjencë më të madhe, është e mundur që çdo person ta gjejë kontributin e tij në botë, duke përdorur natyrën dhe ndërtimin e tij të veçantë.

Problemet e botës sonë nuk mund të zgjidhen në nivelin e të menduarit që i krijoi ato, dhe kjo është arsyeja pse inteligjenca jonë e lindur njerëzore është kaq e rëndësishme tani. Secili prej nesh zotëron aftësi më të larta të inteligjencës njerëzore, të cilat mund ta shohin shkakun rrënjësor të dilemave tona njerëzore dhe të na bëjnë të aftë t’i trajtojmë ato përmes njohjes origjinale dhe shpalljes vetjake nga një burim më i lartë. Është vetëm përmes kontaktit me këtë anë më të lartë të inteligjencës sonë që ne mund ta trajtojmë rrënjën më themelore të këtyre problemeve dhe të udhëzohemi se si ta mbështesim zgjidhjen e tyre në mënyrën më të drejtpërdrejtë e më të fuqishme.

Për çdo person ekziston mundësia të bëhet kontribuues në botë. Kjo dëshirë për të shërbyer e për të kontribuar është e brendshme në natyrën tonë më të thellë dhe pasqyron qartësinë e vizionit dhe vullnetin e vërtetë që kishim përpara se të vinim në botë. Pa më shumë kontribuues të udhëhequr nga inteligjenca e tyre shpirtërore njerëzore, zgjidhjet e shumta që i nevojiten botës sonë nuk do të lindin dhe kontakti me jetën inteligjente nuk do të shihet drejt e nuk do të marrë përgjigje në interesin më të mirë të species njerëzore. Pa një kontribut më të madh individual, qytetërimi ynë njerëzor do të fillojë të përkulet nën peshën e shumë krizave të bashkuara.

Pa individin, pa Dijen dhe pa përgatitjen e brendshme për të sjellë përpara kontributin tonë më të madh, shpresa për njerëzimin zbehet dhe bota do të vazhdojë rrugën e saj të pandalshme drejt një të ardhmeje shumë shkatërruese, pavarësisht edhe nga përpjekjet tona më të mira politike e teknologjike për ta përmirësuar jetën në Tokë.

Nëse mund ta sjellim përpara këtë inteligjencë më të madhe — ta kultivojmë brenda vetes dhe të ndërmarrim hapat për ta bashkuar atë në jetët tona të përditshme — secili prej nesh mund të jetë pjesë e një force më të madhe për të mirën në botë. Veprimet dhe vendimet e frymëzuara të çdo personi, si tani ashtu edhe në vitet përpara, mund të bashkohen për të krijuar një forcë kaq pozitive në botë, dhe është pikërisht për ta fuqizuar e për ta siguruar këtë përfundim që po vihen në dispozicion Mesazhi i Ri dhe Hapat drejt Dijes.