Komuniteti i Madh është universi më i gjerë i jetës inteligjente, në të cilin bota jonë ka ekzistuar gjithmonë. Ky Komunitet i Madh përfshin të gjitha botët në univers ku ekziston jetë e ndjeshme, në të gjitha gjendjet e evolucionit e të zhvillimit. Mesazhi i Ri zbulon se njerëzimi është në një fazë të hershme e adoleshente të zhvillimit të tij dhe se tani ka ardhur koha që njerëzimi të përgatitet për të dalë në Komunitetin e Madh. Është këtu, duke qëndruar në pragun e hapësirës, që njerëzimi zbulon se nuk është vetëm në univers, madje as brenda botës së tij.

Dija është mendja dhe inteligjenca më e thellë shpirtërore brenda çdo personi, që pret të zbulohet. Dija përfaqëson pjesën e përjetshme të nesh, e cila nuk e ka lënë kurrë Zotin. Mesazhi i Ri flet për Dijen si shpresën e madhe të njerëzimit, një fuqi e brendshme në zemër të çdo personi, të cilën Mesazhi i Ri i Zotit është këtu për ta zbuluar e për ta thirrur përpara. Dija ekziston përtej intelektit. Vetëm ajo ka fuqinë të na udhëzojë secilin drejt qëllimit tonë më të lartë dhe marrëdhënieve të fatit tonë në jetë.

Errësira e Madhe është një Ndërhyrje në zhvillim nga disa raca të Komunitetit të Madh, të cilat janë këtu për të përfituar nga një njerëzim i dobët e i përçarë. Kjo po ndodh në një kohë kur familja njerëzore po hyn në një periudhë prishjeje e çrregullimi në rritje, përballë Dallgëve të Mëdha të ndryshimit. Ndërhyrja e paraqet veten si një forcë dashamirëse e shpëtimtare, ndërsa në të vërtetë synimi i saj përfundimtar është ta minojë lirinë dhe vetëvendosjen njerëzore dhe ta marrë nën kontroll botën e burimet e saj. Si popujt vendas të kësaj bote, ne thirremi ta kundërshtojmë këtë Ndërhyrje dhe të paralajmërojmë e të arsimojmë të tjerët, duke e bashkuar kështu familjen njerëzore në një qëllim të madh të përbashkët dhe duke e përgatitur botën tonë për sfidat e mundësitë e jetës në Komunitetin e Madh.

Dallgët e Mëdha të ndryshimit janë një grup forcash të fuqishme mjedisore, ekonomike e shoqërore, të cilat tani po bashkohen mbi botën. Dallgët e Mëdha kanë fuqinë ta ndryshojnë rrënjësisht fytyrën e botës. Këto Dallgë nuk janë një ngjarje e fundit të botës apo apokaliptike, por një periudhë kalimi drejt një gjendjeje të re botërore. Mesazhi i Ri zbulon çfarë po vjen për botën dhe përgatitjen më të madhe që duhet të ndërmarrin mjaft njerëz. Ai bën thirrje për bashkim e bashkëpunim njerëzor, të lindur tani nga nevoja e pastër për ruajtjen dhe mbrojtjen e qytetërimit njerëzor.